Clinton prys Zuma oor WB-toernooi
2010-06-24 10:27
In-diepte Verslae
Die regering het R10,2 miljoen opgedok vir ’n luukse suite om Afrika-staatshoofde en ander hooggeplaastes tydens die Wêreldbeker-sokkertoernooi te onthaal.
Meer Suid-Afrikaanse kunstenaars gaan by Fifa se Wêreldbeker-konsert by die Orlando-stadion optree, het vervaardigers gesê.
Sarel van der Walt, Beeld
Gauteng - Die sokkergogga het hom gebyt, het oudpres. Bill Clinton van die VSA Woensdagmiddag aan pres. Jacob Zuma gesê voordat hy die Amerikaanse span in sy wedstryd teen Algerië op Loftus Versfeld gaan ondersteun het.
“Ek het al heelparty van die WB-wedstryde op televisie gekyk. Julle bied die toernooi baie goed aan,” het Clinton op die trappies by die voordeur van Mahlamba Ndlopfu, Zuma se ampswoning, gesê.
Hy het ’n welwillendheidsbesoek aan Zuma gebring.
“Voordat ek hierheen gekom het, was ek in Tanzanië en het ook daar op TV na van die wedstryde gekyk. Voor dit was ek ook in Argentinië, waar daar ’n wonderlike sokkeratmosfeer is,” het Clinton gesê.
“Van my vriende is al die hele toernooi lank hier en hulle het ’n fees.”
Sy vrou, Hillary, is die huidige Amerikaanse minister van buitelandse sake.
Die voormalige Amerikaanse president het toegegee hy het eers van sokker geleer toe sy dogter Chelsea as vyfjarige saam met seuntjies en meisies begin sokker speel het.
“Al is jou verdediging ook hoe goed, daar is altyd iemand wat iets onvoorspelbaar doen,” het Clinton gesê.
Hy is baie tevrede met die Amerikaners se vertoning in die eerste twee wedstryde, het die 42ste Amerikaanse president gesê.
Clinton (63), wat op die oog af oud geword het, sal in die naweek ook Fortune, Time en CNN se elfde Global Forum in die Kaapstadse Internasionale Konferensiesentrum bywoon.
Zuma het gesê nadat die Amerikaners verlede jaar die eindstryd van die Konfederasiebeker-toernooi in Suid-Afrika gehaal het, het die sokkerwêreld begin besef hulle kan nie meer onderskat word nie.
Met verwysing na Bafana Bafana het Zuma gesê al is Bafana uitgeskakel, het die span met sy goeie vertonings die wêreld van hom laat kennis neem.
Toe ’n joernalis aan Zuma gevra het of “enige ander vooraanstaande Amerikaners” ook die toernooi sal bywoon, het die president met ’n glimlag geantwoord: “Ek weet na wie jy verwys. Toe ek pres. Barack Obama in Washington gesien het, het hy gesê as die Amerikaanse span die eindstryd haal, sal hy kom.”
Hierop het Clinton met ’n vonkel in die oog bygevoeg: “Dan gaan daar ’n miljoen Amerikaners hierheen kom!”
- Beeld