Boere vir Bafana
2010-06-22 07:16
In-diepte Verslae
Die regering het R10,2 miljoen opgedok vir ’n luukse suite om Afrika-staatshoofde en ander hooggeplaastes tydens die Wêreldbeker-sokkertoernooi te onthaal.
Meer Suid-Afrikaanse kunstenaars gaan by Fifa se Wêreldbeker-konsert by die Orlando-stadion optree, het vervaardigers gesê.
Charles Smith en Karen Ebersohn, Die Burger
Bloemfontein - Die boere van Suid-Afrika steun Bafana Bafana deur dik en dun – ongeag wat gebeur.
Louw Steytler, president van Vrystaat Landbou (VL), het ’n passievolle beroep op alle Suid-Afrikaners gedoen om vas te klou aan die nuwe gees van patriotisme wat met die Wêreldbeker-sokkertoernooi in die land posgevat het.
Die boere van die land is in gees met die Suid-Afrikaanse span – en sal veg om hierdie nuwe gees te laat voortleef ter wille van die land.
Bafana is Dinsdagmiddag in hul laaste groepwedstryd teen Frankryk hier in ’n oorlewingstryd gewikkel.
Steytler het gesê Bafana Bafana se loesing van 3-0 teen Uruguay is “hoegenaamd nie” die einde van die tweede herlewing van Suid-Afrika se reënboog-ideaal nie.
“Die hoogtepunt van Suid-Afrika die laaste paar weke was nie die moord op en begrafnis van Eugène Terre’Blanche of Julius Malema wat die voorgrond betree het en die middelgrond van die stem van redelikheid in die land oorheers het nie.
“Ons moes gekonsentreer het op die 50 000 Blou Bul-ondersteuners wat in Soweto gaan rugby kyk het en die massiewe samewerking wat bewerkstellig is onder al die volkere in hierdie land met die ondersteuning van die WB-toernooi en Bafana Bafana.”
Die onmin en probleme in die Franse kamp kan in die tuisspan se guns stel. Die doelskieter Nicolas Anelka is die naweek huis toe gestuur nadat hy Raymond Domenech, die afrigter, glo tydens hul laaste wedstryd gevloek het.
Domenech is Maandagaand op ’n nuuskonferensie, wat deur 300 joernaliste bygewoon is, gepeper met vrae. Hy moes ook kwaai verduidelik oor die afwesigheid van die kaptein, Patrice Evra, wat nie soos gewoonlik met die laaste nuuskonferensie voor wedstryde aan sy sy was nie. Daar word nou ook gewonder of die kaptein vandag gaan speel. Daar is ook vrae of hy nog die kaptein gaan wees ná sy betrokkenheid by die drama agter die skerms.
Daar is ook aan die afrigter gevra of die spelers nog na hom luister en of daar spelers is wat nié wil speel nie.
Domenech het die spelers wat in opstand was, gevra om hul blufspel te laat staan en gepleit om nie so op te tree nie, “dit ondenkbaar dom van hulle is” en dat dit as ’n misstap beskou word.
Die Franse is ook hard op die vingers getik deur dié land se minister van sport, Roselyne Bachelot-Narquin. Sy het ’n vergadering met dié span gehou oor die “absolute verleentheid en skande” wat die span wêreldwyd veroorsaak het.
Bachelot-Narquin het om 21:00 ’n nood-nuuskonferensie gehou, wat deur sowat 150 joernaliste bygewoon is.
Bachelot-Narquin sou reeds gister na Frankryk teruggekeer het. Pres. Nicolas Sarkozy het haar egter opdrag gegee om met die span te kom praat.
Afskoptyd
16:00: Suid-Afrika t Frankryk, Bloemfontein (SABC 1, SS 3).
Die Wonderwerk:
Suid-Afrika het vanmiddag ’n klein wonderwerkie nodig. As hy nie die eerste gasheerland wil word wat nie die tweede ronde haal nie, moet die volgende gebeur:
* Bafana Bafana móét die Franse met minstens drie doele klop.
* Om Suid-Afrika te help, moet Uruguay vir Mexiko met 2-0 klop, of Mexiko moet Uruguay 3-0 klop.
As Uruguay en Mexiko egter gelykop eindig, sal hulle deurdring met vyf punte elk.
- Die Burger