Benni al weer in pekel
2010-05-20 09:23
In-diepte Verslae
Die regering het R10,2 miljoen opgedok vir ’n luukse suite om Afrika-staatshoofde en ander hooggeplaastes tydens die Wêreldbeker-sokkertoernooi te onthaal.
Meer Suid-Afrikaanse kunstenaars gaan by Fifa se Wêreldbeker-konsert by die Orlando-stadion optree, het vervaardigers gesê.
Eduan Roos
Johannesburg - Benni McCarthy, die stout seun van Suid-Afrikaanse sokker, is in die moeilikheid – skaars ’n week nadat hy hom by Bafana Bafana se oefenkamp aangesluit het.
Dié 32-jarige doelskieter sal binnekort voor ’n tugkomitee van die Suid-Afrikaanse Sokkervereniging (Safa) verskyn nadat hy Dinsdag geweier het om vir ’n mediasessie in Sandton op te daag.
McCarthy, wat reeds verskeie kere sy rug op die nasionale span gedraai het, het hom glo vervies vir berigte dat Carlos Alberto Parreira, die Bafana-afrigter, hom weggelaat het vir die naweek se wedstryd teen Thailand omdat hy “te vet en onfiks” is.
Parreira het kort voor dié wedstryd, wat Bafana met 4-0 in die Mbombela-stadion in Nelspruit gewen het, gesê McCarthy moet eers sy fiksheid en toewyding bewys voordat hy speelkans in die Suid-Afrikaners se komende oefenwedstryde sal kry.
Volgens Leslie Sedibe, Safa se uitvoerende hoof, is McCarthy steeds “volkome toegewy” daaraan om Suid-Afrika in die Wêreldbeker-toernooi in Junie en Juilie te verteenwoordig en was die berigte oor sy gewig “onregverdig”.
“Ek keer nie goed dat Benni ’n mediasessie misgeloop het nie, maar die kritiek teen hom was té erg,” het Sedibe gesê.“Hy het egter nie weggebly omdat hy kwaad was oor dié stories nie, maar het persoonlike probleme gehad en reeds verskoning gevra.”
Tog is McCarthy, wat die afgelope seisoen weinig speelkans gekry het vir sy Engelse klub, West Ham United, nie verseker nie van ’n plek in Parreira se uitsoekgroep, wat teen 1 Junie aangekondig moet word.
Die doelskieters Katlego Mphela, Surprise Moriri, Siyabonga Nomvethe en Bernard Parker het almal die laaste tyd met hul spel beïndruk.
Intussen het een van Bafana se sterverdedigers, Bryce Moon, volgehou dat hulle nie van stryk gebring sal word deur die voortslepende betalingsgeskil tussen dié span en die land se sokkerbase nie. ’n Spelerskomitee, onder leiding van Aaron Mokoena (kaptein) en Matthew Booth, het hom verlede week tot Tony Irish, uitvoerende hoof van die Suid-Afrikaanse Krieketspelersvereniging (Saca), gewend in ’n poging om tot ’n vergelyk te kom oor wedstrydgeld en bonusse tydens WB 2010.
Dít nadat Safa verlede week belowe het om R1 miljoen te betaal aan elke speler wat in dié toernooi ’n doel aanteken.“Vir ons gaan dit nie oor die geld nie, maar eerder om ’n droom te verwesenlik deur jou land in ’n Wêreldbeker te verteenwoordig,” het Moon gesê.
“Safa se belofte is ’n goeie motivering, maar dit sal nie naby kom daaraan om die Wêreldbeker vas te hou nie. Elkeen van ons wíl in die eindstryd wees.”
Sedibe het gister ook bevestig dat Bafana in nog drie oefenwedstryde sal speel, voor sy eerste kragmeting van die skouspel – op 11 Junie teen Mexiko.Bafana pak die sterbelaaide Bulgarye Maandag in die Orlando-stadion in Soweto, Colombia drie dae later in die Soccer City-stadion in Johannesburg en Denemarke op 5 Junie.
Bly op hoogte van al die jongste sportnuus deur Nuus24Sport op Twitter te volg.
- Sport24