Bafana se Everest
2009-12-27 13:51
In-diepte Verslae
Die regering het R10,2 miljoen opgedok vir ’n luukse suite om Afrika-staatshoofde en ander hooggeplaastes tydens die Wêreldbeker-sokkertoernooi te onthaal.
Meer Suid-Afrikaanse kunstenaars gaan by Fifa se Wêreldbeker-konsert by die Orlando-stadion optree, het vervaardigers gesê.
Jaco van der Merwe
jaco.vdmerwe@sport24.co.za
Kaapstad - Ná ses jaar se afwagting op 2010 is Suid-Afrika meer gereed om die Wêreldbeker-sokkertoernooi aan te bied as om self daarin te speel.
Teen die tyd dat die verf binnekort in al tien die spogstadions droog is, gaan Bafana Bafana steeds nie 11 spelers hê wat die gasheerland kan trots maak tydens die wêreld se grootste sokkerskouspel nie.
Bafana het ’n droewige jaar beleef waartydens hulle tot die 86ste plek op die wêreldranglys – hul swakste in bykans 16 jaar – teruggesak het. Die vooruitsig dat Suid-Afrika die eerste Wêreldbeker-gasheer gaan word wat in die eerste ronde sneuwel, hang nou meer as ooit soos ’n swaard oor Bafana se koppe.
Dis haas ondenkbaar dat die span wat onlangs hulpeloos rondgetrippel het teen Ysland, ’n kat se kans in sy groepwedstryde teen Mexiko, Uruguay of Frankryk het. Al drie tel onder die top 20 op die wêreldranglys met die Franse so hoog soos sewende. Ysland was bykans nie eens onder die voorste 100 spanne toe hulle Suid-Afrika in Oktober met 1-0 in Reykjavik verneder het nie.
Suid-Afrika se afrigter, Carlos Parreira, glo dat Bafana vir die tweede ronde sal kwalifiseer as hulle die peil kan herwin waarmee hulle so amper die bronsmedalje voor Spanje se neus weggeraap het tydens die Konfederasiebeker-toernooi vroeër vanjaar.
Ja, Bafana hét sy ondersteuners trots gemaak tydens dié toernooi, maar almal weer daarna die josie in gehad deur een skande ná die ander te maak.
Bafana gaan bars om die peil te herwin waarmee hulle die magtige Brasiliane 87 minute lank in toom gehou het in Junie. Veral omdat Bafana nie vir die Afrikanasiebeker-toernooi in Januarie kon kwalifiseer nie en daar nog nie een internasionale wedstryd voor die Wêreldbeker-toernooi geskeduleer is nie.
Parreira glo dat hy die span sal kan slyp tydens vier oefenkampe in die aanloop tot Junie. Dis in Januarie in Suid-Afrika, Maart in Brasilië, April in Duitsland en in Mei weer in Suid-Afrika.
Bafana het drie van hul sterre tydens die Konfederasiebeker-toernooi – die middelveldspeler Steven Pienaar, die verdediger Matthew Booth en die doelwagter Itumeleng Khune – kwaai gemis in die tweede helfte van die jaar. Hulle het omtrent al die wedstryde ná die toernooi weens beserings misgeloop.
As dié drie weer op hul pos is en die doelskieter Benni McCarthy op sy stukke is, kan Bafana dalk met ’n fanatiese skare bankvas agter hulle die onmoontlike vermag en twee groepwedstryde in 2010 wen.
Een sege en een gelykop-uitslag kan ook oorlewing verseker, maar vier punte is geen waarborg op ’n plek in die tweede ronde nie. Dít was die bitter pil wat hulle in 2002 moes sluk ná ’n sege oor Slowenië en ’n gelykop-uitslag teen Paraguay.
- Rapport