Bafana móét vandag wen
2010-06-16 07:27
In-diepte Verslae
Die regering het R10,2 miljoen opgedok vir ’n luukse suite om Afrika-staatshoofde en ander hooggeplaastes tydens die Wêreldbeker-sokkertoernooi te onthaal.
Meer Suid-Afrikaanse kunstenaars gaan by Fifa se Wêreldbeker-konsert by die Orlando-stadion optree, het vervaardigers gesê.
Eduan Roos en Retha Grobbelaar
Johannesburg - Die Suid-Afrikaanse sokkerspan wil Woensdag geskiedenis maak wanneer hy Uruguay in ’n buig-of-bars-wedstryd op Jeugdag op Loftus Versfeld in Pretoria pak.
Aaron Mokoena, Bafana Bafana se kaptein, het Dinsdag gesê dié wedstryd beloof om “selfs meer emosioneel te wees” as die openingskragmeting Vrydag teen Mexiko omdat dit die 34ste herdenking is van die Soweto-onluste in 1976.
Bafana móét dié wedstryd wen om sy aanspraak op ’n plek in die tweede ronde van WB 2010 lewend te hou, nadat hy sy eerste kragmeting teen Mexiko met 1-1 gelyk geëindig het.
Wen die tuisspan dié wedstryd, is hy byna verseker van ’n buiging in die tweede ronde – iets wat hy in twee vorige probeerslae nie kon regkry nie.
Verloor Mokoena-hulle, móét hulle oortuigend afreken met die sterbelaaide Frankryk, waarteen Bafana Dinsdag in Bloemfontein speel.
“Ons almal is deeglik bewus wat dié dag vir Suid-Afrikaners beteken en veral vir die jeug,” het Mokoena gesê.
“Daarom sal dit selfs nóg meer spesiaal wees as ons kan wen en om meer as net een rede kan feesvier.”
Mokoena het ook Bafana-aanhangers gevra om hul vuvuzelas “ekstra hard te blaas” wanneer dié wedstryd om 20:30 afskop.
“Ons wil aanhou om die vuvuzelas te hoor. Veral more (vandag) gaan ons dit besonder nodig hê,” het Mokoena gesê.
Pretoria is ’n gelukkige jagveld vir Bafana. Die span het nog nooit ’n wedstryd in die Jakarandastad verloor nie.
Boonop gaan die Springbokke daar wees om hul sokker-eweknieë te ondersteun.
Hul afrigter, Peter de Villiers, het die Bokke se afdag – wat môre sou wees – met ’n dag vervroeg sodat hulle vandag tyd met hul geliefdes kan deurbring.
Vroegaand woon hulle ’n spanbou-ete by, voordat hulle na Loftus vertrek om die sokker te kyk.
Siphiwe Tshabalala, wat Suid-Afrika se spogdoel teen Mexiko aangeteken het, het gister belowe dié span sal vanaand nóg beter vertoon.
“Ek kon steeds nie gewoond raak aan al die bohaai sedert daardie doel nie,” het hy gesê.
“Ek is nie ’n held nie; die hele span moet goed speel vir ons om te wen.
“Ons is almal oorgehaal om Uruguay reg van die begin af aan te val en die land nóg trotser op ons te maak.”
As Bafana nie deurgaan na die tweede ronde nie, sal hy die eerste gasheerspan wees wat in die eerste ronde van ’n Wêreldbeker-toernooi uitval.
Bafana sal egter moet uithaal en wys as hy Uruguay, wat een plek hoër as Mexiko op die ranglys is, wil klop.
- Sport24