53 000 WB-kaartjies verkoop
2010-04-16 11:05
In-diepte Verslae
Die regering het R10,2 miljoen opgedok vir ’n luukse suite om Afrika-staatshoofde en ander hooggeplaastes tydens die Wêreldbeker-sokkertoernooi te onthaal.
Meer Suid-Afrikaanse kunstenaars gaan by Fifa se Wêreldbeker-konsert by die Orlando-stadion optree, het vervaardigers gesê.
Johannesburg – Altesaam 53 000 kaartjies vir die Wêreldbeker-sokkertoernooi is Donderdag binne die eerste agt ure van die finale fase verkoop, het Fifa gesê.
Fifa het die stadige pas van verkope en ongeduldige skare toegeskryf aan tegniese probleme wat vertragings met die verkoopsproses teweeggebring het.
Sowat 23 van die 64 wedstryde is uitverkoop nadat kaartjies by kaartjieskantore en banke landwyd oor die toonbank beskikbaar was, het Fifa gesê.
Match, die maatskappy wat deur Fifa aangestel is om die kaartjieverkope te behartig, het om verskoning gevra vir tegniese probleme wat ervaar is.
Die polisie is weens dié probleme na verkooppunte in Johannesburg, Kaapstad en Pretoria ontbied om ongeduldige geesdriftiges in beheer te hou.
Jaime Byrom, die uitvoerende hoof van Match het gesê hulle het die “uitdagings geïdentifiseer” en sokker-aanhangers vir hul geduld bedank.
Die verkoopsproses het so stadig verloop dat slegs 32 uit ’n groep van 1000 mense ná drie ure daarin geslaag het om kaartjies te koop.
Fifa en die plaaslike reëlingskomitee is nou onder druk om die laaste oorblywende 450 000 kaartjies verkoop te kry voor die maandlange toernooi wat op 11 Junie afskop.
-Sport24