500 miljoen kyk afsluiting van WB 2010
2010-07-11 11:49
In-diepte Verslae
Die regering het R10,2 miljoen opgedok vir ’n luukse suite om Afrika-staatshoofde en ander hooggeplaastes tydens die Wêreldbeker-sokkertoernooi te onthaal.
Meer Suid-Afrikaanse kunstenaars gaan by Fifa se Wêreldbeker-konsert by die Orlando-stadion optree, het vervaardigers gesê.
Meer as 500 miljoen mense wêreldwyd gaan vanaand op televisie na die afsluitingsplegtigheid van WB 2010 by Soccer City in Johannesburg kyk.
Die halfuur lange geleentheid, wat beloof om ’n kleurryke skouspel te wees met 780 sangers en dansers, spesiale effekte en ligvertonings, word na 215 lande gebeeldsend.
Dit begin om 18:30 – twee uur voor die groot einstryd tussen Nederland en Spanje.
Die WB-eindstryd elke vier jaar is die enkele geleentheid wat die meeste kykers lok.
Soos die openingsplegtigheid sal die vertoning ’n sterk Afrika-gevoel weergee met kunstenaars soos die Afrikaanse sangeres Nianell, asook die Grammy-wenner Ladysmith Black Mambazo, Jozi, Stoan Seate, Slikour, Zuluboy, Abigail Kubeka en die tradisionele groep Ihashi Elimhlophe.
Nigerië se 2Face en Samini van Ghana tree ook op.
Maar dit sal die popster Shakira en die Suid-Afrikaanse groep Freshlyground wees wat die skare op hul voete gaan hê met die amptelike WB 2010-lied, Waka Waka (This Time for Africa).
Dié lied is die no. 1-lied in 15 lande en was in Junie die mees gekykte video op YouTube met meer as 70 miljoen kykers.
Mnr. Derek Carstens, bemarkingsbeampte van die reëlingskomitee, sê die openingsplegtigheid was ietwat meer tradisioneel om Afrika se herkoms gestand te doen. Die afsluitingsplegtigheid gaan egter ’n groot, “jeugdige” partytjie wees.
“Afrika se eerste Wêrelbeker-sokkerreeks het die vasteland se unieke en kleurryke gees en warmte uitgedra en vanaand se plegtigheid sal dié gees weergee.
“Die skouspel gaan ’n lofsang wees vir die besonderse sokker wat gedurende die toernooi gespeel is, asook vir ondersteuners en hul ondervindings.
“Dit sal mense herinner aan wat Suid-Afrika die wêreld die afgelope maand gebied het en sal ondersteuners aanmoedig om ons land hierna in groot getalle te besoek,” sê Carstens.
Fifa het ondersteuners gister gewaarsku om van openbare vervoer gebruik te maak en reeds van 14:30 af na Soccer City te gaan, waar mense teen 18:00 reeds hul sitplekke moet inneem.
Ondersteunersparke sal ook van 14:00 af oop wees.
Die eindstryd tussen Nederland en Spanje begin om 20:30.
- Volg Nuus24 op Twitter
- Rapport