Djakarta – 3de bom het misluk
2009-07-24 10:13
Djakarta, Indonesië – ‘n Derde ploftoestel wat tydens ‘n aanval op twee hotelle gebruik sou word, was gestel om af te gaan vóór selfmoord-bomaanvallers hulself daar opgeblaas het.
Die toestel, wat op die 18de vloer van die J.W. Marriot-hotel gevind is, het nie afgegaan nie.
Indien die bom wel ontplof het, sou dit mense waarskynlik na die grondvloer van die hotel gedryf het, waar selfmoordbomaanvallers oomblikke later twee bomme laat ontplof het.
Die tydsberekening van die derde ploftoestel dui op soortgelyke taktieke as wat in vroeëre aanvalle in Indonesië gebruik is, het Ketut Untung Yoga van Indonesië se polisie gesê.
Die bomontploffings in Djakarta het 9 lewens geëis en rondom 50 mense beseer.
Die terroriste-aanvalle het plaasgevind in twee van Indonesië se luukste hotelle, die Ritz-Carlton en die J.W. Marriot.
Ten minste 14 buitelanders is in die aanvalle oorlede of beseer.
Indonesië is die wêreld se grootste Moslem-nasie. Die aanvalle eindig ‘n vierjaarlange stilte in terroriste-aanvalle in die Suidoos-Asiese land.
Indonesië se minister van sekuriteit, Widodo Adi Sucipto, het aan verslaggewers gesê kragtige plofstowwe is in die aanvalle gebruik.
Niemand het onmiddelik verantwoordelikheid vir die bomontploffings aanvaar nie.
‘n Kenner op die gebied van terrorisme, Rohan Gunaratna, het egter gesê daar bestaan ‘n sterk moontlikheid dat die aanvalle die werk was van Djemaa Islamija. Dié terroristegroep is verbonde aan al-Qaida.
“Hierdie aanvalle verpletter die vreedsame situasie wat ons totdusver geniet het,” het Sucipto gesê.
Die laaste terroriste-aanval in Indonesë het vier jaar gelede plaasgevind to ‘n driedubbele selfmoordbomaanval op die toeriste-eiland Bali 20 lewens geëis het.
In 2002 het bomme in twee nagklubs op Bali, met ’n oorwegend Hindoe-bevolking, ontplof. Lede van die Djemaa Islamija-netwerk is skuldig bevind aan dié aanvalle waarin 202 mense dood is, onder wie 88 Australiërs, berig Reuters.
Twee jaar later het ’n bom in die Australiese ambassade in Djakarta ontplof.
Geen Suid-Afrikaners is tot dusver aangemeld as dood of beseer in die ontploffings nie.
- AP